ང་ཚོའི་སྐོར།

གྲེ་སེར་འབྲོང་དང་ཁ་དཀར་གཡག་སྟེ། འབྲོང་གཡག་ཅེས་པའི་ཚོགས་ཆུང་འདི་ནི་ཕྱི་ལོ་༢༠༡༩ ལོ་ནས་གསར་འཛུགས་བྱས་ཤིང་། ༢༠༢༤ ལོར་དངོས་སུ་ཁྲིམས་མཐུན་དེབ་སྐྱེལ་བྱས་པའི་ཧྥ་གླིང་བོད་མི་གཞོན་སྐྱེས་ཁག་གཅིག་གིས་ལས་ཞོར་དུ་སྒྲུབ་བཞིན་པའི་ཚོགས་ཆུང་ཞིག་ཡིན། ངེད་འབྲོང་གཡག་ཚོགས་ཆུང་གིས་ཕྱི་ཡུལ་དུ་འཚར་ལོང་འབྱུང་བཞིན་པའི་བོད་མི་ན་གཞོན་ཚོའི་ཆེད་དུ། སློབ་སྦྱོང་གི་ཡོ་ཆས། བོད་རང་ཉིད་ཀྱི་སྐད་ཡིག་གི་ལམ་ནས། རྩེད་ཆས་ཀྱི་རྣམ་པའི་ཆ་ནས། གསར་བཟོ་བྱས་ཏེ། བྱིས་པ་ཚོར་བོད་པའི་སྐད་དང་རིག་གནས་ལ་སློབ་སྦྱོང་གི་སྤྲོ་སྣང་གསར་བ་ཞིག་དང་། དགེ་རྒན་དང་ཕ་མ་ཚོར་སློབ་ཁྲིད་སྟབས་བདེ་ཡོང་ཆེད་དུ། སློབ་སྦྱོང་ཞེས་པ་ནི་དཔེ་དེབ་ཁོ་ནའི་ཁྲོད་ནས་སྦྱངས་དགོས་པར་འདོད་པའི་རྒྱ་ལས་གྲོལ་ཏེ་རྩེ་ཆས་ཀྱི་རྣམ་པ་འམ། ཐབས་ལམ་གསར་བ་ཞིག་གི་ཆ་ནས་ཐོན་རྫས་གང་མང་ཞིག་བཟོ་བསྐྲུན་གནང་དང་གནང་བཞིན་པ་ཡིན། འདི་དག་གིས་བོད་སྐད་ཡིག་དང་རིག་གནས་ཕྱི་ཡུལ་ནས་ཉམས་པ་སླར་གསོ་དང་མི་ཉམས་རྒྱུད་འཛིན་གནང་བཞིན་པའི་སྤྱི་ཚོགས་འདིའི་སྟོང་ཆ་ཧ་ཅང་ཕྲ་མོ་ཞིག་བསྐོང་ཐུབ་པའི་རེ་བ་བྱེད་བཞིན་ཡོད་ལ། དེ་བཞིན་ང་ཚོས་གསར་བཟོས་བྱས་པའི་སློབ་སྦྱོང་ཡོ་ཆས་བོད་ཡུལ་གྱི་ས་ཁྲ་སྟེ། རྣོ་ཁབ་ལེན་རང་བཞིན་ཅན་གྱི་ལྷུ་སྒྲུག་རོལ་རྩེད་དང་། དབྱངས་གསལ་སོ་བཞི་སྟེ་བོད་ཡིག་དབུ་ཅན་གྱི་ཡུག་གཟུགས་འབྲི་ཚུལ་སྨྱུག་ཁ་འཐེན་སྟངས་དཔེ་མཚོན་ཤོག་བྱང་གཉིས་ལ། བྱིས་པ་དང་དགེ་རྒན། ཕ་མ་ཚོས་རྒྱབ་སྐྱོར་དང་དགའ་བསུ་རྒྱ་ཆེན་པོ་ཐོབ་བཞིན་འདུག འདི་ནི་སྤྱི་ཚོགས་འདིའི་ལས་གནས་ཆེས་སྤྱིར་བཏང་པ་ཞིག་ནས་བོད་སྐད་ཡིག་རིག་གནས་ཀྱི་སྟོང་ཆ་ཧ་ཅང་ཕྲ་མོ་ཞིག་བསྐོང་བཞིན་པའི་ངེད་འབྲོང་གཡག་ལས་བཟོ་པ་ཚོར་མཚོན་ན་དགའ་འོས་པ་དང་། མདུན་སྐྱོད་ཀྱི་སྤོབས་པ་སྟེར་བའི་གསོན་ཤུགས་གཙོ་པོ་དེ་ཆགས་ཡོད།

དེ་ཡང་ཉམ་ང་བའི་བོད་ཀྱི་སྐད་ཡིག་རིག་གནས་འདི། འཛམ་གླིང་མཐོ་སྒང་གི་གངས་རིའི་གྲང་ངར་གྱི་ཁྲོད་ན་ཁེར་རྐྱང་དུ། དཔའ་ངར་ཞུམ་མེད་ངང་རྫོགས་ལ་ཉེ་བའི་རིགས་རྒྱུད་འདིའི་རྩ་བ་སྲུང་ནས་འཚོ་བཞིན་པའི་འབྲོང་གཡག་གི་ལས་དབང་དང་གཅིག་མཚུངས་ཡིན་པས། ལོ་རྒྱུས་ཀྱི་དཀྱོག་མཚམས་འདི་ནས་ང་ཚོ་བོད་མི་ཚོས་རྣམ་པ་འདྲ་མིན་དང་། ཐབས་ལམ་སྣ་ཚོགས་བརྒྱུད་ནས་ལས་གནས་ཆེས་སྤྱིར་གཏང་བ་གཉེར་མཁན་ང་ཚོས་ཀྱང་། ཆར་བ་ཆུ་གྲོགས་དང་ཉི་མ་མེ་གྲོགས་ཀྱི་ཚུལ་དུ། རང་ནུས་གང་ཡོད་ཀྱིས་སྐད་ཡིག་འདི་འཆི་ལམ་ནས་སྐྱོབ་ཐབས་བྱེད་གལ་ཆེ་བས། ངེད་འབྲོང་གཡག་ལས་བཟོ་པ་ཚོས་ཀྱང་མཐོན་པོའི་རྒྱབ་སྐྱོར་དང་ཕྱུག་པོའི་སྦྱིན་བདག་སོགས་གང་ཡང་མེད་པར། རང་རང་གི་ལག་ཟུང་གཉིས་ལ་བརྟེན་ནས་ཁུ་སིམ་སིམ་ངང་། ཕྱི་གླིང་གི་གྲུ་ཟུར་རེ་རེ་ནས་ཉིན་མཚན་ལྟོས་མེད་ཀྱིས་འབད་པ་བྱེད་བཞིན་ཡོད་པས། ང་ཚོ་དང་ལས་དབང་གཅིག་པའི་སློང་མོ་བ་དག་གིས་འབྲོང་གཡག་གི་ར་རྩེར་སྐྱོད་པའི་གྲང་རླུང་སྐམ་མོ་དེ་མཉམ་སྤྱོད་བྱེད་འདོད་ཡོད་ཚེ། ངེད་འབྲོང་གཡག་གི་ཕ་ས་གྲུ་བཞི་འདི་ནས་ང་ཚོ་མཉམ་འཛོམས་བྱས་ཡོང་། གཤམ་གསལ་ནི་འབྲོང་གཡག་སྤྱིའི་འདུ་ར་ཕྲ་མོའི་གློག་འཕྲིན་དང་དྲ་ཚིགས་ཁ་བྱང་ཡིན་པས་སྐུ་ཉིད་ངེས་ཕེབས་ཡོང་བར་ཞུ།

Contact us at jigmey@dongyak.com

or call us at 06 11 63 46 17